Berako bestetako pilota jaialdiak izan ziren ortziralean. Gizonezko profesionalen artekoa Aspek antolatu zuen eta emakumeena Adosek. Horren inguruan, txupinazoa botatzearen ardura izan duen Goldatz emakume feminista taldeak ‘Baldintza berdinak pilotari guztientzat, gora emakume pilotariak’ zioen pankarta zintzilikatu zuen. Gizonezkoen partida nagusiaren aitzinetik, omenaldia eskaini zitzaien Nafarroako herriarteko pilota txapelketa txikia Berara ekarri zuten pilotari gaztetxoei eta herriaren izenean, oroigarria hartu zuten Aitor Elexpuru alkatearen eskutik.
Gizonezkoen jaialdiko lehen partidan, Peio Etxeberriak eta Erostarbek 22-13 irabazi zieten Zabala eta Bikuñari eta partida nagusian, Elordik eta Zabaletak 22-17 irabazi zieten Altuna III.ari eta Rezustari.
Ados pilota elkartekoen partidan, berriz, Irantzu Etxebeste Iantzi herritarrak eta Maite Ruiz de Larramendik irabazi zieten Iera Agirre Iturriaga leitzarrari eta Orbegozori.