Lesakako Beti Gazteak ekainaren 4an antolatutako VII. Argazki Rallyko irabazleen izenak jakinarazi ditu eta ekainaren 30ean, ortziralean 19:00etan eginen du sari banaketa ekitaldia elkartearen egoitzan. Sarituei zuzendutako ekitaldia izateaz gain, irekia izanen da, nahi duen guztiarentzat.
Ohi bezala, Beti Gaztek bortz gai proposatu zituen eta horietako bakoitzean irabazleak 100 euro hartuko ditu saritzat. Honela, ‘Estresa’ gaiari lotutako argazkirik onena Manu Barreiro Rodriguezek aurkeztutakoa da; ‘Eguraldia’ gaiari buruzko argazkirik onena, Tomas Sarasola Villahozena; ‘Aperitifa’ gaiari buruzkoa, Javier Lopez Fabianena; ‘Jolasa’ gaiari buruzkoa, Jose Miguel Romero Barcorena eta ‘Kale artea’ gaiarena, Jose Luis Rodriguez Moranena. Horretaz gain, Fred Ramos Lasaga lesakarrak Beti Gazteko bazkide batek aurkeztutako bildumarik onenaren saia hartuko du, 100 eurokoa. Bildumarik onena aurkeztu duen argazkilari onenak, azkenik, Javier Lopez Fabianek, 150 euroko saria hartuko du.
Lan sarituak Beti Gazte elkartearen webgunean ikus daitezke dagoeneko.