Nafarroako, Akitaniako eta Euskadiko txirrindulari-zutabeak Lesakan elkartuko dira ekainaren 10ean, bizikleta bidezko mugikortasun jasangarria sustatzeko. Lesaka BIZI-FEST topaketak bizikletaren erabilerari lotutako jardueren programa ludiko zabala eskainiko du, eta, era berean, Bizi-Connect proiektuaren azken ekitaldia izanen da. Proiektu hori Nasuvinsa-Lursareak sustatu eta gidatu du, eta euroeskualdea osatzen duten hiru lurraldeek parte hartu dute.
Nafarroako txirrindulariak Sunbillako garbitokitik abiatuko dira larunbatean 11:30ean eta bide berdean barna ailegatuko dira Lesakara. Gipuzkoa eta Lapurdi aldetik, berriz, Hondarribia eta Hendaiatik abiatu, Irunen elkartu eta etorriko dira Lesakara. 13:00etan Euskadi, Akitania eta Nafarroako ziklisten topaketa eginen dute Lesakako Plaza Zaharrean eta bertako produktuen dastaketa izanen dute Kasino jatetxean.
14:00etatik 16:00etara Bizi-kleta tailer eta jolasak izanen dituzte frontoian, haurrentzako bizikletako trebetasun-zirkuituak, norbere bizikletarekin joan bizi-kleta diagnostiko tailerra ere eginen dute eta musika izanen da.
Antolaketa errazteko, parte hartzeko asmoa dutenek konfirmazioa bidaltzea eskatu dute, teknikaria1@lesaka.eus helbide elektronikora eta 662 64 81 81 whatsapp zenbakira. Sare sozialetan ere eman daiteke izena, Lesakako Bizibide Turismoaren orrietan.