Aipatzekoa da zeharbideak arautzen dituen araudiaren arabera, Lesakako morfologiarengatik eta konfigurazio historikoarengatik, eraikinen arteko distantzia ez dela nahikoa, eta horrek eragiten du, batetik, biztanleria-dentsitate handieneko bi auzok ez dutela espaloirik herriko erdigunera ailegatzeko, eta, bertzetik, 12 metrotik goitiko ibilgailu astunak ezin direla eremu horretan ibili.
Herriaren hazkundeari dagokionez, gogoratu behar da Lesaka Baztan-Bidasoaldeko motor ekonomikoetako bat dela, eta Lapurdiko eta Gipuzkoako mugatik eta Iruñetik gertu egonik, nazioarteko zenbait enpresa hartzen dituen bi industrialde ditu. Herrigunea gurutzatu gabe poligono horretara sartzea ezinezkoa izateak bertze eragozpen bat dakar garapen ekonomiko eta urbanistiko horrekin segitzeko.
Modu berean, etorkizuneko saihesbide horri esker, gaur egun Lesakako herrigunean bultzatzen ari den mugikortasun-plana bukatu ahal izanen da. Horretarako, oztopo arkitektonikoak kendu, espaloiak eta galtzada berdindu eta batez ere oinezkoentzat eta bizikleta erabiltzeko pentsatutako eremuak sortzen ari dira.