Bortzirietako Berdintasun Zerbitzuak antolatua, LGTBI+ gaien inguruko emanaldiak egiten hasiak dira. Maiatzaren 9an egin zen lehena Beran, ‘Transformatzen’ dokumentala eman baitzuten Beralandetan. Hurrengoa, maiatzaren 26an, ortziralean 19:00etan Etxalarko Pello Apezetxea Kultur Etxean izanen da, 'Bihotz, bi hots, bi txotx!' bakarrizketa saioa, hain zuzen.
Bakarrizketa Garazi San Martinek emanen du eta 16urtetik goitiko jendeari zuzenduta dago. Ekitaldia doakoa da.
Maitasun erromantikoari kritika sakona da bakarrizketa, eta horren ildora hainbat gai ukituko ditu: polimaitasuna, espazioen gestioa, mugak, sare sozialak... Dena bizipen bollero batetik.
Azkena ekainaren 30ean
Ekainaren 30ean izanen da azken ekitaldia. Zinegoak jaialdiko film laburren emanaldia izanen da Berako Beralandetan, ekaineko azken ortziralean, 20:00etan. Bilboko Gaylesbitrans Nazioarteko Zinema eta Arte Eszenikoen Jaialdia da Zinegoak eta bertako film laburren aukeraketa emanen dute.