Izen ematea aldez aitzinetik egin daiteke esteka honetan edo egun berean 06:30 eta 07:30ak bitartean, elkartearen egoitzan. Federatuak 13 euro ordaindu beharko dituzte federazio txartela aurkeztuta eta 15 euro federatu gabeek. Irteera elkartetik bertatik aterako da 07:30ean.
Parte hartzaile bakoitzak kartulina bat hartuko du irteerako kontrolean, eta Intzola Larhun eta Idoia lepoko kontroletan eta elkartera ailegatzean aurkeztu beharko dute.
Ibilbidean zehar, lau hornidura puntu egonen dira janariarekin eta edariarekin: Intzolan (9km), Larhunen (15km), Idoiako lepoan (19km/22km) eta elkartean bukaeran.
Osatu beharreko ibilbidea
Mendizaleak Agerra auzotik aterako dira Manttalera (5.km), lehen gailurrera joateko. Ibardinetik igaro ondoren, Intzolara joanen dira (9km) eta handik Iasolako Bentara joanen dira (11.km). Ibilbideko puntu horretan, martxa luzea Larhunera igoko da (15.km), gero Lizuniagara jaitsi (19.km) eta Idoiako Lepotik (22.km) Larretagaina igoko dute. Handik Agerrara joanen dira, 26 kilometroko ibilbide zirkularra osatuz.
Ibilbide motzaren kasuan, 11. kilometroan, Iasolako Bentan, Maletera jaitsiko dira (16. km), hortik Idoiako Lepoa eta Larretagaina igoko dituzte, eta ibilbidea Agerran bukatuko dute 22 kilometroak osatuta.
Bi ibilbideen profilak ikusteko sakatu hemen.
Ibilbide luzeko bertze martxa batzuk
Berako Mendi Itzulia Nafarroako Mendi Kirol Federazioak antolatzen duen Ibilbide Luzeko Mendi Ibilaldien Nafarroako Zirkuituan dago. Orain arte Sakanako, Etxalarko eta Hiru Mendi Zerrak ibilaldiak egin dituzte, eta hurrengo hitzorduak hauek izanen dira: Berako Mendi Itzulia (maiatzaren 21ean), Baztango Mendi Ibilaldia (maiatzaren 28an), Aralarko Mendi Ibilaldia (ekainaren 11n), Aresoko Itzulia (irailaren 3an), Erronkariko Pirinio Garaiko Martxa (irailaren 23an) eta Irañetako Euskal Herriko Erdigunera ibilaldia (urriaren 1ean).