Orain, testu-ingurua eman dio Bor-borrek instalazio horiei, eta euskara etxekotzeko aldarria egin du. Euskara gure etxean, euskaraz gure etxean leloarekin hizkuntza-ohiturei erreparatu eta etxetik euskara sustatzearen garrantzia azpimarratu nahi du. Instalazio bakoitzean euskararen funtzio sozialaz eta erabileraz gogoeta eragiten duten esaldi edo galderak paratu dira.
Hizkuntza-ohituretan eragiteko kolektibitatearen lanaren garrantzia azpimarratu nahi du Bor-borrek, eta hortik Borborraldia bera antolatzea edota Bor-bor lanean hasi izana. Hizkuntza-ohituretan aldaketak gertatzeko baldintza batzuk sortu behar dira, eta hori sustatu nahi du Bor-borrek.
Baina, era berean, norberaren konpromisoetatik ere behar du, eta etxean lanketa egitera gonbidatu nahi ditu herritarrak, norberak hausnartuz zein egoeratan egiten duen euskaraz, euskara erabiltzen ez duenean zergatik den (hautu kontzientea den, kanpoko faktoreek eragindakoa, ohitura sozialak dauden, beldurrak, zalantzak, utzikeria…), edo zein baldintza behar dituen hizkuntza-erabilera horiek aldatzeko. Borborraldiaren ondotik ere ildo honekin lanean segitzeko asmoa agertu du Bor-borrek.