Ez daude geldirik egoteko Lesakako San Fermin jubilatu elkartekoak. Apirileko ipar martxa ikastaroaren eta Gesaltza Añanako irteeraren ondotik, maiatzean ere zenbait ekitaldi antolatu dituzte. Bereziena, maiatzaren 13an, larunbatean 10:00etatik 13:00etara jubilatuen ostatuan eginen duten espezia eta infusio tailerra izanen da. Egunerokoan landareak eta espeziak erabiltzen ikasiko dute, baita hauen propietateak, sukalderako erabilerak eta hainbat bitxikeria. Ikastaroaren prezioa 15 eurokoa da (bazkide ez direnek 30 euro) eta txartelak erosteko azken eguna maiatzaren 8a da.
Maiatzaren 6an ibilaldi arautua
Honen aitzinetik, maiatzaren 6an, ohiko ibilaldi arautua eginen dute. Larunbatean 09:30ean hasita eginen da izen-ematea eta 10:00etan abiatuko dira lehen ibiltariak Alondegiko arkupetatik eta Harriondoa, Sumusa, Kastillobaita, Matxitenea, Txakaingo zubia eta Txakaingo Iturriraino joan ondotik, ibilbide bera eginez eginen dute elkarterainoko itzulera. Ibilbidea bukatzean, pintxoa emanen zaie parte-hartzaileei.