Vianako duatloia jokatu zen apirilaren 16an eta Nafarroako distantzia erdiko duatloi txapelketa bertan erabaki zen. Aspaldian duatloi batean aritu ez bazen ere, Beti Gazteko Bixente Igarzabal lesakarrak parte hartu zuen eta, gainera, joan den urtekoa errepikatuz, bitan igo zen podiumera. Izan ere, txapeldun izan zen 50 eta 59 urteko kirolariak biltzen dituen beteranoen bigarren mailan eta hirugarren txapelketa nagusian.
Distantzia erdiko duatloi honetan 15 kilometro lasterka, 75 kilometro bizikletan eta azken 9,5 kilometroak berriz ere lasterka egin behar izan zituzten kirolariek. Igarzabalek 3 ordu, 42 minutu eta 31 segundo behar izan zituen ibilbide osoa egiteko: 52 minutu eta 55 segundo behar izan zituen lehen zatian lasterka; bi ordu, 8 minutu eta 48 segundo bizikletan eta 37 minutu eta 38 segundo azken lasterkaldian.
Honela, aipatu bezala, txapeldun izan zen beteranoen bigarren mailan eta hirugarren txapelketa nagusian, Saltoki Trikideak taldeko Joseba Del Barrio eta Sakana Triatloi Taldeko Sergio Garcia de Eulateren ondotik.
