Nafarroako Herri Kirol Jokoen azken jardunaldia eta finalak apirilaren 2an, igandean 11:00etan hasita jokatuko dituzte Sunbillako pilotalekuan. Hasiera batean Igantzin egitekoa zen, baina eguraldi iragarpena dela eta, Sunbillan izanen da azkenean.
Martxoan zehar, Atarrabian, Olaztin, Antsoainen eta Etxarri Aranatzen jokatutako lau jardunaldietako emaitzak kontuan hartuz, alebin mailako proba konbinatuan, 27 taldetatik Andra Mari 5, Araxes, Andra Mari 4 eta Antsoain A izanen dira finalean. Igantziko bi taldeak doi-doi gelditu dira finaletik kanpo, baita Baztango Basaburukoa ere.
Infantil mailako proba konbinatuan, berriz, bederatzi taldetatik Araxes, Berriozar, Andra Mari 3 eta Igantzi izanen dira finalean. Hemen ere Basaburua finaletik kanpo gelditu da.
Kadete mailako proba konbinatuan, berriz, aitzineko lau jardunaldietan erabaki da txapelketa eta Igantzi suertatu da txapeldun, lau jardunaldietan nagusitu ondotik. Ondotik sailkatu dira Araxes, Antsoain, Antsoberri eta Andra Mari. Igandean hartuko dute txapela igantziarrek, baina kategoria honetan egun bakarreko lehiaketa ere izanen dute.
Sokatiran ere ariko dira infantil eta kadete mailako taldeak, kasu honetan, eskualdeko ordezkaritzarik gabe. Infantil mailako bosgarren jardunaldia jokatuko da eta Igantzin erabakiko da txapelduna. Kadete mailan, aldiz, lau jardunalditan erabaki da sokatirako txapela ere eta Hotsein taldea suertatu da txapeldun, Antsoain, Iñigo Aritza, Antsoberri eta Araxesen aitzinetik.