Euskal Herriko goma gaineko zortzinakako sokatira txapelketak aitzinera segitzen du. Otsailaren 18an Berangon (Bizkaia) gizonezkoen 600 kiloko kategorian finalerako sailkatu diren sei talde onenak ariko dira. Lehen bi jardunaldietan Beti Gaztek irabazi ditu tiraldi guztiak eta lesakarrekin batera, Gaztedi, Goiherri, Ñapurrak, Abadiño eta Amaiur ariko dira finalean.
Azken txapelak banatzea falta
Otsailaren 25ean, Laukizen (Bizkaia), emakumezkoen 500 kiloko finala eta gizonezkoen 560 kiloko txapelketa, saio bakarrean, jokatuko dituzte. Gizonezkoen pisurik arinenean Beti Gazte izanen da eskualdeko ordezkari bakarra eta Abadiño, Berriozar, Gaztedi, Goiherri, Ibarra, Ñapurrak eta Txantrearekin lehiatuko da.
Martxoko lehen asteburuan, larunbatean, martxoak 4, junior eta 23 urtez beheitiko txapelketa jokatuko dute Abadiñon (Bizkaia) eta igandean, martxoak 5, txapelketa mistoko (580 kilo) finala Ibarran (Gipuzkoa). Hau izanen da talde gehien bilduko dituen txapelketa, hamabi guztira. Amaiur eta Beti Gazterekin batera, bina talde paratuko dituzte goma gainean Abadiñok, Gaztedik eta Ibarrak eta bana Antsoain, Badaiotz, Berriozar eta Goierrik.