Lanak Mariezcurrena enpresak burutu ditu, bi hilabete inguru luzatu dira. Berako udala eta bizilagunak gustura gelditu dira lanak nola egin diren ikusita. Aurreikusita zueden bide mozketa eta eragozpenak ez dira azkenean hainbertze izan. Udalak eta bizilagunek Mariezcurrena enpresa eta kanal berria eraikitzen ibili diren langile taldea eskertu dute publikoki.
Kalbario errekaren kanal berria eraikitzeaz gain bertze hainbat hobekuntza egin dira: Oinezkoentzako mugikortasun eta irisgarritasunean hobetu da, auzora iristeko espaloi berria eraiki delako. Hondakin ontzien puntua ere hobetu da, zola hormigonatuz. Argiteria ere berritu da, eraikitako eskailera eta iparraldera gelditzen den horma argiztatuak geldituko direlarik. Lorenzobaita etxe aldera ere espazio bat egokitu da, etorkizunean banku batzuk paratuz bizilagunentzat elkargune bat izan daitekeena.
Erreka lurperatzen den puntuan eraiki den horman, plaka bat paratzeko asmoa ere badute, Plaza Zaharraren historia ezagutarazteko. Espazio hau frontoi ireki bat zen, Saran eta Urruñan aurkitu ditzazkegun moduan. XVIII. mendean, erreka honek gainez egin, eta kalte egin zituen Plaza Zaharrean hasi eta Zia errekaraino. Bidean zeuden bi zubi aurrean eraman zituen.
Obraren kostua 544.275,23 eurokoa izan da eta Nafarroako Gobernuak 497.390,76 euroko dirulaguntza eman du. Beraz, Berako udalak paratu beharrekoa 46.884,47 euro da.
Nafarroako Gobernuaren diru laguntza lortzeko udalak ahalegin handia egin behar izan duela azpimarratu dute. Aurrez aurreko bilerak egin dituzte Nafarroako Gobernuko Toki Administrazio departamentuarekin, Lurralde Kohesio atalarekin eta Lehendakaritzarekin ere. Ahalegin honek emaitza onak izan ditu, finantziazio handia lortu delako.