Gaur egun Beran hiru aparkaleku mota daudela oroitarazi dute: plaza zuriak, berdeak eta urdinak. Plaza zurietan edozeinek aparkatzen ahal du inolako denbora mugarik gabe. Plaza berdeak beratarrentzat gordetako plazak dira, eta horietan aparkatzeko udalak banatutako txartel berdea behar da, eta autoan paratu behar da. Plaza horietan, zurietan bezala, ez dago aparkatzeko denbora mugarik.
Urdinez markatutako plazak denbora mugatutako plazak dira. Horietan, edozeinek, beratarra izan ala ez, aparkatu dezake, baina ordubeteko denbora mugarekin (denden ordutegi barrenean 09:00-13:00/ 16:30-20:00 lan-egunetan, eta 09:00-13:00 jai ez diren larunbatetan). Plaza horietan aparkatzeko inguruan dagoen edozein dendatan hartu daitekeen ordu-diskoa paratu behar da. Aipatutako ordu horietatik kanpo libre da aparkatzea guztientzat, denbora mugarik gabe. Plaza urdinak Kanttonberri eta Legia karrikan, Mukixu Haur Eskola parean, Altzate karrikan eta Altzate plazan daude, eta behar bezala seinaleztatuak daude kartelen bidez.
Arau hauek errespetatzeko deia egin du udalak, eta gainera betearazteko «kontrol zorrotza» eginen dutela nabarmendu du: «Udalak neurri guztiak ezarriko ditu horiek errespetarazteko, eta kontrol zorrotza eginen du. Sistema hau arauak betetzen dugunon mesederako izanen delakoan gaude. Arauak betetzen ez dituztenek jakin behar dute jarrera hori zigortua izanen dela, guztion eskubideak defendatzeko».