Berako Udalak, Gure Txokoa Elkarteak eta CXM Events ari dira probaren antolaketan, eta proba atzeratzearen arrazoi nagusia zein den aletu dute: «Gaur egun metro erdi baino gehiagoko ur putzuak daude zirkuituan, eta horrek ezinezkoa egiten du bai zirkuitua muntatzea, bai lehiaketarako erabiltzea ere. Iragarpenek ere ez dute laguntzen, hurrengo orduetan ur eta elur gehiago eman baitute».
Barkamenak eskatu dizkiete parte hartzaileei aldaketak sortu ditzakeen eragozpenak direla eta: «Gure esku dagoen horretan laguntzeko prest gaude, hala nola hoteletako erreserbetan edo antzekoetan», nabarmendu dute. Gainera, azaldu dute data aldaketa dela eta proban parte hartu ezin dutenek inskripzioaren zenbateko osoa jasoko dutela bueltan.