2023ko inauteriak iragarriko dituen kartela aukeratzeko lehiaketa deitu du Lesakako Udalak. Urtarrilaren 20an, 13:00etan bukatuko da aurkezteko epea. Irabazleak 250 euroko saria jasoko du.
Kartelaren neurria A2koa izan beharko du (420 x 594 mm) eta bertan, derrigorrez, 2023ko INAUTERIAK LESAKAN otsailaren 16tik 21era azaldu beharko da. Lesakan jaioak edo bertan erroldatutako 18 urtetik goitiko pertsonek parte har dezakete eta aurkezten dituzten lanak jatorrizkoak eta argitaratu gabeak izan behar dute.
Aurkezpena gisa hauetako lehiaketetan ohikoa den sistema erabiliz egin daiteke, urtarrilaren 20ko 13:00ak arte.
Erakusketa urtarrilaren 23tik 27ra liburutegian
Aurkezten diren lan guztiekin erakusketa bat osatuko da liburutegian, urtarrilaren 23tik 27ra (biak barne). Herri bozketak erabakiko du irabazlea, eta haren erabakia ezin izanen da gibelera bota. Horretarako, erakusketak irauten duen bitartean, bertan, Lesakan jaioek edo bertan erroldatuak direnek bozkatzeko aukera izanen dute aipatutako egunetan. Kartel irabazleak 250 euro hartuko ditu. Lesakako Udala jabetuko da lan sarituez eta bertzeak itzuli eginen dira.