Joan den urteko lehen edizioaren bidetik, pilota egokituko Espainiako bigarren txapelketaren finalak jokatuko dituzte abenduaren 18an, igande eguerdian Iruñeko Labrit pilotalekuan. Urritasun fisikoa duten pilotariek aulki gurpildunean jokatu duten txapelketaren finalean ariko da Joseba Lasa lesakarra. Lekunberriko Edorta De Antarekin ariko da, Meñakako Gaizka Fernandez eta Oiartzungo Beñat Lizasoren kontra.
Adimen urritasuna duten pilotarien paleta egokitutako txapelketaren finalean, berriz, Zumaiako Leire Esnal eta Mutrikuko Eneko Sagarmendi, Zarauzko Mikel Vega eta Joseba Altunaren kontra ariko dira.
Txapelketa honetako sailkapen fasea abenduaren 11n jokatu zuten Eibarren (Giouzkoa) eta 42 pilotarik parte hartu zuten, Euskal Herrikoak nahiz Errioxatik eta Asturiastik etorriak. Zortzi onenek jokatuko dituzte finalak igandean Labriten.