Rock and Rollaren ardatzaren bueltan dabilen lana da kaleratu dutena. Joseba Irazoki eta Lagunak taldearen kasuan psikodelia ukitu batzuk ditu, eta Pettik, aldiz, kutsu rockeroagoa eman dio.
Joseba Irazokik bere ohiko banda izan du bidelagun grabaketan. Felix Buff baterian, Jaime Nieto baxuan eta Ibai Gogortza gitarran. Pettik, aldiz, Sergio Gonzalez izan du lagun baterian eta Karlos Osinagak grabatu ditu baxua eta txeloa. Osinagak berak grabatu du diskoa Bonbereneako estudioan eta Irazokiren kantuetan ahotsak ere sartu ditu.
Azken aldia eta Luka abestiak sortu ditu diskorako Joseba Irazoki eta Lagunak taldeak, eta Gerra bakoitzaren ondoren eta Dirdira hori Pettik.
Diskoa aurkezteko hainbat kontzertu eginen dituzte. Lehenengo kontzertua abenduaren 11n izanen da Bonberenean, Tolosan. Ondotik, heldu den urteko urtarrilaren 12an Donostiako Dokan aurkeztuko dute, otsailaren 2an Ordizian, eta otsailaren 15ean Bilboko Biran.