Azaroak 25

«Kolektiboki antolatu behar dugu, banaka ez dugu arazoa konponduko»

Ines MATXIARENA ALDALUR, Goldatz Berako Talde Feministako kidea

«Inguruan izan diren indarkeria kasuak ikusita, indarkeria horri elkarrekin aurre egiteko beharra sumatu dugu». Goldatz Berako Talde Feministaren izenean, halaxe adierazi du Ines Matxiarena Aldalurrek. Eta hori izan da azaroaren 25aren bueltan «Bortzirietako talde feministak berriz elkartu» izanaren arrazoia. Aurtengo hitzorduaren atarian, «autodefentsa feminista eta Bortzirietako emakumeen saretzea» dute bereziki begiz joa.

«Herritarren zati bat gero eta kontzientziatuagoa» nabaritzen dute Berako talde feministakoek, baina «oraindik ere egiteko lan haundia» ikusten dute. «Aunitzetan ez gara indarkeriak identifikatzeko gai. Jendartean oraindik irainak, mehatxuak, mespretxuak, txiste matxistak… Ez dira indarkeriatzat hartzen». Bide beretik, «indarkeria mota aunitz» daudela oroitarazi du Matxiarenak, «eta gehienetan indarkeria fisikoa bakarrik ikusten dugu. Ikusten ez den indarkeriari iskin egiten diogu, egonen ez balitz bezala, eta hori arazo haundi bat dela uste dugu». Hain zuzen, horretarako «pedagogia gehiago» aldarrikatu du.

Beran izan ziren ziztada kasuak ere izan ditu hizpide, eta gogoan du «erantzun zabala eman zitzaiela». Erantzunetik haratago, ordea, ez dute zalantzarik Berako talde feministakoek: «beldurra zabaltzeko mekanismo gisa funtzionatu dute uda osoan, eta hori ere indarkeria matxista da».

«Gizonek ere badute euren erantzukizuna»

Honen guztiaren gibelean, «arazoa sistema patriarkala» dela nabarmendu dute, eta hori iraultzeko «kolektiboki antolatu behar dugula» adierazi dute; «banaka ez dugu konponduko». Baina ez hori bakarrik. «Gizonen erantzukizuna» ere agerian utzi dute: «Hasteko beraien pribilegioak zalantzan jarri beharko lituzkete…». Batetik eta bertzetik eraginez, erronka argia da Matxiarenaren arabera: «euskal herri feminista bat eraikitzea».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun