'Bera', Berako musikariei buruzko liburua aurkeztuko dute larunbatean

Ttipi-Ttapa 2022ko urr. 19a, 18:00
Joseba B.Lenoir musikaria emanaldi batean.

Banizu Nizuke editorialaren ekimenez, eta Berako Udalaren laguntzarekin idatzi du Pablo Salgadok 'Bera' liburua. Berako herriak musikarekin izan duen harremana lantzen du liburuak, 50 elkarrizketaren bidez. 

Aurkezpena 19:00etan izanen da Berako Kultur Etxean, idazlea bera, eta Estitxu Pinatxo musikaria eta Berako Udaleko kultura arloko zinegotzia izanen dira. Ondotik, Rüdiger taldearen kontzertua izanen da

Liburua dagoeneko eskuragarri dago Banizu Nizuke editorialaren webgunean, eta baita Berako hainbat dendatan ere. Bi edizio kaleratu dituzte, euskarazkoa eta gaztelerazkoa. 

Sinopsia

Begi bistakoa (edo belarri entzutekoa) den arren eta zaletuen artean behin eta berriro agertzen den gaia izan arren, gaur arte inork ez du jorratu eta dokumentatu Berako herriak euskal musikaren sorkuntzari dakarkion fenomeno berezia. Denon ahotan (eta belarritan) zegoen eta dago garrantzi hori; izan ere, eztabaidaezina da zenbat musikari, disko, soinu eta kontzeptu ekarri dituen Euskal Herriko gainerako soinu-eszenara. Baina, zeinek lotuko zion arrana katuari?

Liburuak luze eta zabal jorratzen du, 50 elkarrizketa baino gehiagoren bidez, zergatik sortzen duen herriak musikari kopuru eta kalitate hori, zergatik esan dezakegun fenomeno baten aurrean gaudela eta zergatik uste dugun Euskal Herri osoko herri interesgarriena dela musikari dagokionez

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun