Illekueta auzoan paratu zituzten lehenengo plakak eta orain Zalain auzora zabaldu nahi du udalak ekimena. Zalainen egin ondotik, asmoa, herriko bertze auzoetara zabaltzea da.
Etxeen izenari dagokionez, Pello Irazokik egindako artxibo lanean oinarritu dira, eta Andres Iñigo euskaltzainak emandako gomendioak hartu dituzte kontuan.
Proiektuaren helburua etxe izenen garrantzia berreskuratzea da. Erdi Arotik hasita, modu ofizialean erregistratuak ageri dira etxe izenak eta nortasun berezia izan dute euskal gizartean. Gaur egun, ordea, herritarrik gazteenak ez dituzte etxe izenak ezagutzen eta erabiltzen, eta hori sustatu nahi dute proiektuaren bidez.
Proiektuaren sustatzaileen hitzetan ukaezina da euskal gizarteak etxearekiko izan duen eta duen lotura, sentimendua, errespetua, maitasuna eta oroitzapena. Izan ere, batzuetan etxeak eman izan dio deitura familiari eta, bertze aunitzetan, jabearen erreferentzia (izena, deitura, lanbidea, jatorria, izengoitia…) hartu izan du izentzat etxeak.