Metrokoadroka Sormen Laborategia konpainiak Bidaide antzerkia aurkeztuko du larunbat honetan, irailaren 24an, Berako Kultur Etxean. 19:30ean izanen da ikuskizuna eta sarrerak lau eurotan eskura daitezke Agara prentsan eta egunean bertan leihatilan. Antzerkia Udalbiltzako Geuretik Sortuak programaren barnean sortua da.
Sinopsia
Nor ote dago erraldoien gonen azpian? Nola ikusten da mundua erraldoien barrutik?
Herrietako erraldoien iruditeriatik modu poetikoan abiatuta, handia eta txikia izatearen arteko aldeaz, herrietako kulturgileen ikusezintasun hautazkoaz edo ez hautazkoaz, kultura bizitzeko moduez mintzo da Bidaide antzezlana.
Bidaide antzezlana modu bisual, poetiko eta umoretsuan aldiro modu ezberdinean gauzatuko den teatro-ekintza bat da. Herrietako kulturgileen jarduna gogoan, agian ekintza bera delako, orain eta hemen egin-egiteko behar hori, etorkizunak amesteko aukera ematen digun bultzadarik garrantzitsuena.