Etxalarren eta Berako Suspela auzoan barrakoi bat, eta metrailadore-habia bat konpondu dituzte auzolandegian parte hartzen ari diren 25 gaztek, eta horiek erakusteko garaia izan dute gaur. Auzolandegiaren arduradunek azalpenak eman dituzte, baita, Aitor Elexpuru Berako Alkateak ere, eta gazteek garbitutako guneak ikusteko aukera izan dute bertan parte hartu duten herritarrek.
Ana Ollo Nafarroako Gobernuko Herritarrekiko Harremanetako Kontseilaria eta Javier Remirez Nafarroako Gobernuko Lehendakariordea eta Lehendakaritza, Berdintasun, Funtzio Publiko eta Barne Kontseilaria ere bertan izan dira gaur goizean azken bi asteetan auzolandegian garbitutako ondarea ikusten. Ollok nabarmendu du «garrantzitsua» dela gazteek bertan bizi izandako «izua eta basakeria» ezagutzea Nafarroa «bidezkoagoa, etikoagoa, solidarioagoa eta demokratikoagoa eraikitzeko».
Bisita horiekin batera, Berako Argaitzeko harrobian fusilatutako herritarrak omentzeko ekitaldia egin du Berako Udalak. Aitor Elexpuruk bertan gertatua oroitu du, eta Ana Ollok ere hartu du hitza. Lore eskaintza egin dute, eta hiru dantzarik aurreskua dantzatu dute. Herritarrez gain, fusilatutakoen senitartekoak gonbidatu dituzte omenaldira.