Gobernu espainolaren EAEko ordezkaritzak ohar baten bitartez jakinarazi duenez, Gipuzkoan eta Nafarroan pertsona bana atxilotu ditu Guardia Zibilak eta hirugarren bat mugaz bertzalde atzeman du Polizia frantsesak. Barne Ministerio espainiarrak jakitera eman duenez, atxilotutakoek 40 bat bidaia egin dituzte mugaren alde batetik bertzera azken lau hilabeteotan, bidaia bakoitzean hiru edo lau lagun eramanez.
Betiere aipatutako iturriak zabaldutako informazioa arabera, orain desegindakotzat jo duten ustezko erakundeko kideek Afrikako iparraldetik eta mendebaldetik Iberiar Penintsulara iritsitako migratzaileekin jartzen ziren harremanetan, eta muga zeharkatzen laguntzen zieten, horretarako baldintza eta prezioak ezarriz.
Guardia Zibilak adierazi duenez, muga pasa aitzinetik «ibilgailu-etxebizitza» batean ezkutatzen zituzten pertsona horiek, eta bideari ekindakoan segurtasun neurriak hartzen zituzten Poliziak harrapa ez zitzan.
Behin muga igarota, pertsona horiek Hendaia, Baiona eta Bordelera eramaten zituzten nagusiki.
Auzia eta atxilotutakoak Iruñeko Instrukzioko 5. Epaitegiaren esku utzi ditu Guardia Zibilak.