JUANKAR UNANUA NAVARRO

GUTUNA: Epa, ba al dago norbait hor?

Ttipi-Ttapa 2022ko uzt. 15a, 14:00

Juankar Unanua Navarro, Igantziko alkate eta N-121-A auzo-plataformako kideak kexu idatzi du, errepidea 2+1 bihurtzeko obrak hasi zirenetik istripuan laugarren pertsona hil den aste berean. Nafarroako Gobernuaren axolagabekeria salatu du.

Epa, ba al dago norbait hor?

Basamortuan predikatzeak zure oreka mentala zalantzan jartzera eramaten zaitu. Baina, aldi berean, konplexuak eta bestelako lotura intelektualak kentzen dizkizu.

Gainera, kasu honetan bezala, girgilu politikoek ere ez zaituztenean mugatzen, norberak pentsatzen duena erran dezake, errepresalien beldurrik gabe. Edo hori uste dut (espero dut).

N-121-A errepideak aspaldi utzi zion zentzuzkoa izateari. Aspaldi utzi zion lotsagarria izateari lotsagarria baino gehiago izateko. Baina, batez ere, aspaldi utzi zion ikusezin izateari. Eta hori da samingarriena, gobernatzen gaituztenentzat hala izaten jarraitzen baitu. Edo hala dirudi.

2021eko urriaren 28an, Nafarroako Parlamentuak, mozio bidez, jatorriz eta helmugarik gabeko salgaien nazioarteko trafiko astuna desbideratzearen aurka bozkatu zuen, lanak irauten duten bitartean. Neurri horrek istripu-arriskua murriztu nahi zuen lanak gauzatzen ziren bitartean. Erran beharra da, aukera hori jasotzen dutela bai 5/2007 Foru Legeak eta bai 18/2018 Errege Dekretuak. Hala ere, jaun-andre parlamentari gehiengoei ez zitzaien garrantzitsua iruditu.

2+1 famatuen lanak hasi zirenetik, lau hildako zenbatu ditugu. Lau. Horietatik hiru, kamioi banaren aurka talka egin ondoren hil ziren. Ba al dakizue zenbat gertatu ziren laneko zatietan? Hirurek!!

Eta neure buruari galdetzen diot ea hau kasualitateari, halabeharrari bakarrik egotz dakiokeen. Nire buruari galdetzen diot, inor ez ote den benetan lotsatuko. Inor ez ote den gutxieneko erantzule sentitzen. Neure buruari galdetzen diot, desbideratze horrek ezin izango ote zuen saihestu, heriotza horietako bat besterik ez bazen ere. Eta, batez ere, nire buruari galdetzen diot ea zuzenean ukitutakoez gain, axola zaion norbaiti.
Chivite andrea, errespetu osoz; aurrez aurre erran nizuen, eta publikoki errepikatzen dizut: kontua ez da inori errua botatzea, segurtasuna hobetzea baizik, arriskuak prebenitzea, eta, prebentzio-ekintzaren printzipioen arabera, arriskuak prebenitzeko modurik onena saihestea da. Eta hori, ziur, zuk nik baino hobekiago dakizu.
Tamalez berandu gabiltza, baina hobe berandu inoiz ez baino.

Erreakzionatu, ahal bada berriz negar egin baino lehen. N-121eko erabiltzaile ikusezinek eskertuko dizuegu.

Juankar Unanua Navarro.
N-121-A auzo-plataformako kidea eta Igantziko alkatea da.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun