Landa inguruneko haurren neuroerrehabiltazioa udako ikastaroa antolatu dute Nafarroako Unibertsitatea Publikoak eta Lesakako Osasun Zentroak (Osasunbidea), Lesakako udalaren eta Bortzirietako familien Guztiok elkartearen laguntzarekin. Irailaren 19tik 24ra emanen dute ikastaroa Lesakako kiroldegian eta dagoeneko izena eman daiteke.
Ikastaroan, Nafarroako landa eremuan egiten diren neuroerrehabilitazio jardueren berri eman eta haien garapenean aurreratu nahi dute. Horretarako, neurogarapeneko nahasmenduak dituzten haurrak zaintzearren Nafarroako Gobernuak emandako jarraibideak landuko dituzte lau egunez, eta haurren familiakoek halako haurren senitartekoentzako elkarteen bidez bilatu ohi dituzten jarduera osagarriak ere izanen dituzte.
Haur txiki-txikiak tratatzeko etapatik hasiko dira, 0 eta 3 urte bitarteko haurretatik, eta, gero, adinean goiti eginen dute: haur koxkorragoak, lehen eta bigarren hezkuntzakoak eta, hala, heldu bihurtzeko trantsizio etaparaino.
Hizlariak administrazio publikoko osasunaren, hezkuntzaren eta gizarte ongizatearen arloko langileak izanen dira, baita entitate pribatuetako profesionalak ere; batzuk halako nahasmenduak dituzten haurren senitartekoen elkarteetakoak; bertze batzuk, ez.
Neurogarapeneko nahasmenduak dituzten haurrak tratatzeko berritasunak ezagutzera eman nahi dituzte, bai esku hartzeko teknika berriak bai halako nahasmenduak detektatzeko, baloratzeko eta tratatzeko protokoloen egokitasuna.
Azkenik, haurren patologia mota horien diagnosiaren eta tratamenduaren zenbait alderdiren berri eman nahi dute, eta horri buruzko ikerketa bultzatu.
Egitaraua
Irailak 19, astelehena
16:00etatik 18:00etara 0-3 urte bitarteko haurren neurorrehabilitazioa. Fase berri bat fisioterapiarentzat hitzaldia emanen du Jesús Vaca, Nafarroako Gobernuko Arreta Goiztiarreko Zentroaren zuzendariak.
18:00etatik 20:00etara hidroterapia tailerra izanen da 0-3 urte bitarteko haurrentzat eta nola koordinatu aretoko terapiarekin azalduko dute Cristina Mendive Santos eta Andrea Domínguez Basartek.
Irailak 21, asteazkena
16:00etatik 18:00etara Eskolako haurren neuroerrehabilitazioa hitzaldi-tailerra emanen dute CREENAko motorikoen moduluko Marta Redondasek eta Nafarroako Unibertsitate Ospitaleku haurren errehabilitazioko medikuak. 18:00etatik 20:00etara, 3-6 urte bitarteko haurren errehabilitazioaz ariko dira Maddi Urra Albizu eta Ainara Orabengoa Elizondo.
Irailak 23, ortziralea
16:00etatik 20:00etara Neurogarapeneko nahasmenduen tratamendu integrala izanen dute hizpide Mercedes Mendiburu neuropsikologoak eta Ane Pacheco logopedak eta Konektoma proiektuaz ere ariko dira.
Irailak 24, larunbata
09:00etatik 10:00etar Neuroerrehabilitazioko teknika berriak: ur azpiko hidroterapia, unibertsitateko berrikuntza proiektua hitzaldia emanen dute Natalia Dominguez Sanz hidroterapeuta eta ur azpiko hidroterapiako adituak, Ana Mari Insausti Serrano medikuak eta Miguel Carabantes Rodriguez, FEDAS-CMAS 2 estrellas (IN2E) elkarteko urpeko igeriketako irakasleak.
10:00etatik 13:00etara Ur azpiko hidroterapia, neuroerrehabilitazio modu berri bat tailerra emanen dute igerilekuan Natalia Dominguez Sanzek eta Miguel Carabantes Rodriguezek.
Norentzat
Osasunaren arloko profesional eta ikasleentzat (fisioterapeuta, terapeuta okupazional eta neuropsikologoentzat), hezkuntzako profesionalentzat, pedagogo terapeutikoentzat, orientatzaileentzat, kiroletako monitoreentzat eta neurogarapeneko nahasmenduak dituzten seme-alaben tratamenduan proaktiboki diharduten senitartekoentzat.
Ikastaroaren zuzendariak
Ana Mª Insausti Serrano doktorea, medikua eta NUPeko Osasun Zientzien Saileko Anatomiako irakaslea.
Natalia Domínguez Sanz, fisioterapeuta eta Nafarroako Unibertsitate Publikoko Osasun Zientzien Saileko irakaslea.
Belén Compains Beaumont doktorea, Lesakako Osasunbideko zentroko pediatra.