Zona norte txapelketako trial proba jokatu zen ekainaren 4an Aretxabaletan (Gipuzkoa), Oztopo klubak antolatua eta bertan izan ziren Lesakako trial taldeko hiru txirrindulariek emaitza bikainak lortu zituzten. Uxuri Portu lehenbizikoa izan zen hasiberrien maila mistoan, Xabier Valverde bigarren izan zen kadete mailan (oraindik infantil mailakoa den arren) eta Goiuri Urra bosgarren izan zen infantil mailan.
Proba hasi eta berehala euria egin zuen eta eremuak nahiko zail paratu ziren. Halere ederki ibili ziren hiru lesakarrak. Atsedenerako asti handirik gabe, igande honetan, ekainak 11, Espainiako Kopako laugarren proba izanen dute Guadalix de la Sierran (Madril) eta bertara hurbilduko da Xabier Valverde.