Bileran parte hartu zuten Aitor Elexpuru Berako Alkateak, euskara mankomunitateko ordezkari ere badena, bertsolariek, euskalgintzako kide batek, euskara mankomunitateko teknikariak, eta azken hilabeteotan Berara bizitzera etorritako 8 herritar, jatorri, kultura, hizkuntza eta bizitza ibilbideen aniztasuna islatzen dutenak. Guztiek aipatu zuten Beran gustura sentitzen direla eta adierazi zuten euskara eta euskal kulturarekiko interesa.
Saioa hasteko Ekhiñe Zapiain eta Julen Zelaieta bertsolariek bina bertso jarri kantatu zizkieten bertaratuei. Bertsoak pantailan izan ziren ikusgai, euskaraz eta itzulpenarekin. Bukaeran, oroigarri gisa, bertsopaperak etxera eraman zituzten gonbidatuek.
Aitor Elexpuruk euskara eta herri euskaldunak izan zituen hizpide. Gonbita egin zien bertaratuei euskara eta euskal kulturara hurbiltzeko. Horrez gain, seme-alabak dituzten gurasoen kasuan, haurrek D ereduan matrikulatzearen garrantzia azpimarratu zuen. Jon Abril euskalgintzako kideak ere hartu zuen hitza, eta euskararen biziberritzean egindako bidea azaldu, eta hizkuntza komunitate bezala dauden erronkak aletu zituen.
Ondoren, gonbidatuek beren burua aurkeztu zuten. Guztiak solastu ziren eta azaldu zuten nondik heldu diren, jatorrizko hizkuntza eta kulturak, lanbideak, asmo eta ametsak, eta abar. Saioa bera antolatu izana eskertu zuten. Honakoak dira bertaratu ziren herritarren jatorriak: Euskal Herria, Nikaragua, Kolonbia, Peru eta Kazakhstan.
Euskara teknikariak, bere aldetik, euskararen inguruko informazio eta baliabideen berri eman zien bertaratuei.
Bukatzeko, berendua izan zen; zerbait jan eta edan bidenabar solastatzen segitzeko eta elkar ezagutzeko parada izan zuten bertaratuek. Asmoa da tankera honetako saioak urtean behin egitea, azken aldian herrira bizitzera etorri diren herritarrei ongi etorria emateko.