Martxan da Bortzirietako udaleku irekietan izena emateko epea

Ekainaren 3an bukatuko da Bortzirietako udaleku irekietan izena emateko epea.

Urtero bezala,  Bortzirietako Euskara Mankomunitateak udaleku irekiak antolatu ditu. Izena emateko epea maiatzaren 23tik ekainaren 3ra bitartean izanen da, eta online egin beharko da, lotura honetan. Herri bakoitzean gutienez 15 haurrek izena eman beharko dute udalekuak antolatzeko.

Udalekuen eskaintza 2010-2018 urteen bitartean jaiotako haurrei eginen zaie; haurrek eskolatuak egon behar dute. Behar bereziak dituzten haurren kasuan, adin muga 15 urtekoa izanen da (2007-2018 bitartean jaiotakoak).

Arantzan, Beran, Etxalarren eta Igantzin udalekuak uztailaren 4tik 29ra biak barne izanen dituzte. 10:00-13:00 bitartean, eta asteka izena emateko aukera izanen dute. Lesakan, aldiz, uztailaren 11n hasi eta abuztuaren 26an bukatuko dira, zazpi aste denera. Kasu honetan ordutegia 09:00-13:00ak artekoa izanen da, eta asteka apuntatzeko aukera ere izanen da. 

Herri guztietan herriko eskolan elkartuko dira, Beran izan ezik. Bertan Ricardo Baroja eskolaz gain, Labiaga Ikastolan ere ibiliko baitira haurrak. 

Prezioari dagokionez, Arantzan, Beran, Etxalarren eta Igantzin astean 15 orduko jarduna izanen dute, eta  ondoko prezioak izanen dira: 

  Aste bat 2 aste 3 aste 4 aste
Ume bat 22,50 euro 45 euro 67,50 euro 90 euro
2 senide (-%15) 38,25 euro 76,50 euro 114,75 euro 153 euro
3 senide edo gehiago (-%30) 47,25 euro 94,50 euro 141,75 euro

189 euro

Lesakan, aldiz, astean 20 orduz elkartuko dira, eta hauek dira prezioak: 

  Aste bat 2 aste 3 aste 4 aste 5 aste 6 aste 7 aste
Ume bat 30 euro 60 euro 90 euro 120 euro 150 euro 180 euro 210 euro
2 senide (-%15) 51 euro 102 euro 153 euro 204 euro 225 euro 306 euro 357 euro
3 senide edo + (-%30) 63 euro 126 euro 189 euro 252 euro 315 euro 378 euro 441 euro

Behar bereziak dituzten familientzako prezioak: 

Behar sozioekonomiko larriak dituzten familientzat, udalekuetan izen emateko baldintzak betetzen badituzte, Bortzirietako Gizarte Zerbitzuen Mankomunitateak onartutako irizpideak erabiliko dira, eta bertako teknikariei eskatuko zaie balorazioa egiteko. Bortzirietako Gizarte Zerbitzuen Mankomunitateak ezarritako irizpideen arabera onura horiek jasotzeko baldintzak Askotariko Eraginetarako Errenta Adierazle Publikoaren (IPREM) araberakoak izanen dira. Baldintzak betetzen dituztenek ezarritako prezioaren %50 ordaindu beharko dute.

Udalekuei buruzko informazio gehigarria hemen aurkitu daiteke. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun