Beti Gazteko jubenilek Gipuzkoako ohorezko mailako finala jokatuko dute larunbatean 17:00etan Beasaingo Loinaz zelaian, Bergararen kontra. Partida handia izanen da, lehen aldiz historian jokatuko baitute Lesakako gazteek kategoria honetako final bat, irabaztekotan lehen aldiz euskal ligan jokatzeko aukera emanen diena, Gipuzkoakoak ez ezik, Araba eta Bizkaiko taldeen kontra. Jokalariak autobusean joanen dira Beasainera eta beraiekin batera joateko aukera ere eman du Beti Gaztek.
Izena emateko, ‘Bergara – izen abizenak’ mezua bidali beharko da Beti Gazteren Whatsapp zenbakira. Plaza mugatuak dira eta izena emateko hurrenkeraren arabera beteko dira plazak. Adin ttikikoek heldu batekin joan beharko dute.
Duela urte bat baino guttiago, Beti Gazteko nagusiek ere Beasainen jokatu zuten Gipuzkoako Ohorezko mailako finala, hirugarren mailarako igoera lortu berritan. Orain, eszenario bera izanen dute, baina orduan ez bezala, zaleek zelaira sartzeko aukera izanen dute eta ea orduko emaitza ere hobetzen duten gazteek.