Eta orain zer?
«Bortzirietan pediatraren beharrean dauden guztiek Lesakako Osasun Etxera joan beharko dute», dio Ruth Gonzalezek. «Orain Lesakako pediatraren kargu geldituko dira Bortzirietako haur guztiak», gaineratu du eta egoerak kezka berezia sortzen dio. «Ez dago inolako aurreikuspenik Berako pediatra ordezkatzeko, gobernuak ez baitu sikiera oposizio-deialdirik egin lanpostua hori betetzeko. Eta Lesakako pediatra ere laster jubilatzeko adinean dagoela kontuan hartzen badugu, arazo honek dezente okerrera egin dezake», azpimarratu du Ruth Gonzalezek. «Nahitaezkoa da Nafarroako Gobernuak epe luzeko planteamendu bat egitea landa eremuetan aplikatzeko. Izan ere, Nafarroako herri ttikietan hutsik gelditu diren lanpostuak ateratzen dituztenean, maiz, oposizio bidez lanpostua ateratzen duenak uko egiten dio eta, aukeran, Iruñera alde egiten du. Horrela ezinezkoa da osasun zerbitzu egoki bat eskaintzea herritarrei».
Baztanen ere pediatrarik gabe azkeneko sei hilabeteotan
Iñaki Marcos Baztango Osasun Eremuko zuzendariak erran digunez, sei hilabete daramatzate pediatrarik gabe. Bitarte honetan, «batzuetan arratsaldez Lesakako pediatra etortzen da eta bertze batzuetan larrialdietako medikua».
OROITU, osasun etxera eta kontsultategietara joaterakoan musukoa eramatea nahitaezkoa da.