Alondegiaren erabilera zehazteko parte-hartze prozesurako 12.400 euroko dirulaguntza hartuko du Lesakako udalak

Nafarroako Gobernuak, Lehendakaritzako eta Gobernu Irekiko Zuzendaritza Nagusiaren bidez, bi laguntza deialdi ebatzi ditu, tokiko erakundeen eta irabazi asmorik gabekoen artean herritarren parte-hartzea sustatzeko. Deialdi bakoitzak 120.000 eta 65.000 euroko balioa du, hurrenez hurren. Eskualdean, Lesakako udalak hartuko du 12.437,82 euroko dirulaguntza, Alondegiko parte-hartze prozesurako.

Prozesu honetan 16.438,66 euroko inbertsioa egin du Lesakako udalak, beraz, lautik hiru dirulaguntza honen bitartez estaltzea lortuko du.

Alondegiaren erabilerak zehazteko prozesuaren bigarren deialdia maiatzaren 21ean

Apirilaren 2ko lan saio arrakastatsuari segida emateko, maiatzaren 21ean, 10:00etan hasita Alondegiaren erabilerak zehazteko partaidetza prozesuaren bigarren saio irekirako deialdia egin du udalak liburutegian. Prozesuaren informazioa eskura izateko bideo labur bat egin du udalak eta gainera, www.lesaka.eus webgunean, Lesaka biziberritzen atalean, bileretako aktak eta orain arte erabilitako dokumentuak ikus daitezke. Herritarrak parte hartzera animatu dituzte.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun