Hirugarren mailako azken partidaren lekuko izan da Lesakako Mastegi futbol zelaia

Hirugarren mailako denboraldi historiko honetako azken partidaren lekuko izan zen larunbatean Lesakako Mastegi futbol zelaia. Barakaldo talde handia izan zen bisitari, Urki Txoperena lesakarrarekin eta harmailak bete zituzten zaleek. Lesakarrak ez ezik, Barakaldotik etorritako ikusle aunitz etorri ziren, harmailak kolorez eta animazioz bete zituztenak. Partida hasi aitzinetik, Beti Gazteko jokalariak eta entrenatzailea zaleei eskerrak emateko pankarta batekin zelairatu ziren. Jabier Maia ‘Pilloti’ kapitainak beraien izena eta zenbakia zeraman Beti Gazteko kamiseta eman zien denboraldi erdian Lesakako taldearekin eta larunbatean Barakaldorekin bisitari etorri zen Urki Txoperenari eta Irlandatik bisitan etorritako Jon Ubiriari. Honek ere denboraldiko lehen erdia egin zuen taldearekin.