Urtarrilean agerturiko zuloaren ondotik, Berako Plaza Zaharreko eskailera azpitik igarotzen den erreka eskaileren gainetik desbideratua dago hodi laranja baten bidez. Udalak bizilagunei bidali dien oharrean dioenez, «azken egunetan izan dugun euria dela eta, ur kopuru bat kanaletik sartu da, eta horren ondorioz gertatu da lur mugimendua eskailera azpian. «Asteburuan ere euria omen dator eta segimendua eginen diote, ura kanalean sartu ez dadin».
Udalak jakinarazi duenez, kanal berria egiteko proiektua eskatua dago, eta lanak aurten hasi eta bukatzeko asmoa dute: «Udaletik ahal dugun guztia egiten ari gara prozesu hau azkartzeko», nabarmendu dute. Edozein zalantza izanez gero udalera gerturatzeko deia luzatu diete herritarrei.