Nafarroako Gobernuak emandako informazioaren arabera, gaur 00:46ak aldera 112 telefonoan hartutako dei batek ohartarazi du Maderas Pikabea enpresaren instalazioak erretzen ari zirela.
Lesakako suhiltzaile boluntarioak eta Oronozko eta Cordovillako suhiltzaileak mobilizatu dituzte berehala. Iritsi direnerako, suak zerrategi osoa hartuta zuela ikusi dute eta, beraz, nabeen kanpoko materiala babestu dute, sugarrek ere har ez dezaten.
Sutea kontrolatutzat jo dute 02:45 aldera, nahiz eta Oronozko suhiltzaileek geroxeago berriz itzuli behar izan duten zerrategira, egon daitezkeen su-hondarrak detektatzeko.
Bertara bidalitako anbulantziak ez du lanik izan, ez baita inor zauritu, eta orain Foruzaingoa gertaeraren arrazoiak ikertzen ari da.