Foruzaingoak Etxalarko bizilagun bat atxilotu du bere emaztea tirokatzeagatik autoan zihoanean

Sunbillan, inguru honetan, tirokatu zuen erasotzaileak bere emaztearen autoa

Atzo foruzainek Etxalarko bizilagun bat atxilotu zuten duela egun batzuk bere bikotekidea Sunbilla parean autoan zihoanean ibilgailuan hartu zuen tiroaren egilea delakoan. Foruzaingoaren arabera, itxuraz errifle batekin egindako tiroak autoaren karrozeriaren kontra jo zuen, gidariari kalte pertsonalik egin gabe.

Duela egun batzuk gertatu zen, emakumea bere autoan lanera zihoanean. Dirudienez, Sunbilla parean zarata handia sumatu zuen baina ez zuen tiro batekin lotu, eta aitzinera segitu zuen.

Ondotik, lanera ailegatu eta gertatutakoaz hitz egin zuenean, lankide batzuek erran zioten ibilgailuak gidariaren aldeko leiho bazterrean zuen zuloa tiro batena izan zitekeela. Igandean, emakumea Foruzaingoaren komisariara joan zen salaketa jartzera.

Foruzaingoak egindako ikerketaren ondorioz, biktimaren senarra eskopeta baten titularra dela egiaztatu zuten, eta horregatik jarri zituzten susmoak haren gainean. «Bikotea banatzeko izapideetan dagoela» gaineratu dute.
 
Foruzaingoaren Laguntza Brigadako agenteek beren gain hartu dute gertaeraren ikerketa eta gaur asteazkena eramanen dute atxilotua epailearengana, bere emazteak jasandako erasoaren egile gisa.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun