Lesakako Sorginxulo kultur bilguneak, udalaren laguntzarekin, Lesakako kulturaren liburu xuria argitaratu du. Bere orrietan zehar, herriko 21 eragileren ezaugarriak, proposamenak, ohiturak eta kontaktuak aurki daitezke, eragile bakoitzak bere eskuz deskribatuak.
Soinulariak, trikitixak, antzerki taldeak, dantzariak, kantariak, musika banda, elkarte eragileak, etab. Irakurtzen duena ohartuko da denetik dagoela, eta denentzat. Sarreran aipatzen denez, herritar guzientzat sortua dago, baita kanpoko jendearentzat ere. Bertakoak, herrian dagoen aberastasun kulturala zehaztasun gehiagoz ezagutzeko. Kanpokoak, Lesaka bisitatzean gorputzaren barruan zein bihotz dabilen taupaka sentitzeko.
Nahi duenak Telletxea liburu-dendan eta Xagu liburu-dendan jaso dezake bi euroren truke. Liburutegian eta turismo bulegoan ere eskuragarri izanen dira, baita Lesakako Udalaren webgunean ere, edizio digital modura.