Euriari aurre eginez 224 azienda plazaratu dituzte Lesakako feria egunean

224 azienda aurkeztu dira ortzegun goizean Lesakan, Bortzirietako feria egunean parte hartzera. Horietatik 126 zaldi-aziendak ziren, 50 behi, batzuk bere aratzearekin eta bizpahiru idi eta zortzi artalde, batzuk bildots eta guzti. Eguraldi bustia izan dute, euritsua eta COVID-19ak sortutako egoeragatik ere, ez da bertze urtetako jendetzarik ibili Lesakako karriketan. Gainera, plaza inguruko obrak direla eta, normalean erabili ohi ez diren lekuak erabili dituzte ospakizunerako. Honela, aziendak frontoiaren gibeleko aparkalekuan paratu dituzte ikusgai.

Behi aziendak

Esnetako behien kategorian lehen eta hirugarren sariak, 190 eta 100 eurokoak, Lesakako Gillen bordako Francisco Javier Altzugarairentzat izan dira eta bigarrena, 160 eurokoa, Berako Begibeltzeneko bordako Joxean Igoa Etxebesterentzat. Haragitako behien kategorian,  190 euroko lehen saria Arantzako Uxainekobordako Joseba Bergarak eskuratu du, 160 euroko bigarren saria Begibeltzeneko bordakoak eta hirugarrena Berako Unai Mendiberrik. Larre behien kategorian, 150 euroko lehen saria eta 70 euroko hirugarrena Jon Muñoa lesakarrak lortu ditu, eta 100 euroko bigarren saria Lesakako Marisol Etxeparerentzat izan da.

126 zaldi azienda

Zaldi aziendetan, Jon Muñoa lesakarrak lortu ditu lehenbiziko eta hirugarren sariak, 125  eta 50 eurokoak. Bigarren saria Lesakako Maria Jesus Maiarentzat izan da, 95 eurokoa. Larre behorrak ere saritu dituzte. 100 euroko lehen saria Oihan Olaizola lesakarrarentzat izan da; bigarrena, 50 eurokoa, Berako Patxi Baldak lortu du eta hirugarrena, 30 eurokoa, Evarista Telletxea lesakarrak eskuratu du.

Monturako zaldi onenaren saria Jon Iturbidek eskuratu du, bigarrena Oihan Olaizolak eta hirugarrena Marisol Etxeparek. Ponnyen artean, lehen saria Berako Sabino Kortak eskuratu du, bigarrena Jaime Etxegarai beratarrak eta hirugarrena Berako Sergio Hernandezek.  Bi modalitate hauetan 100, 50 eta 30 euroko sariak izan dituzte.

Zortzi artalde

Zortzi artalde plazaratu dituzte, gehienez 5 ardi eta ahari batekoak. Batzuk bildots eta guzti. Horien artean, lehen saria (100 euro) Lesakako Gillen bordako Francisco Javier Altzugaraik eskuratu du; bigarrena (90 euro), Joseba Irigoien lesakarrak eta hirugarrena (70 euro) Berako Ana Maria Irigoienek.

Baina azienda feriaz gain, eskulangileak plaza inguruan izan dira eta elikadura postuak ere paratu dituzte plazako aparkaleku inguruan.

Bertso saio ikusgarria

Sebastian Lizaso eta Amets Arzallus bertsolariak kantari aritu dira, baina ez kioskotik, Ezpelteneko balkoitik baizik, presoen senide eta lagunek hauen eskubideen aldeko elkarretaratzea isilean egin duten bitartean. Presoekin elkartasunean zerria ere zozketatu dute aurten eta 1.117 zenbakiari egokitu zaio.

Ajoarriero lehiaketa

Bezperan Beti Gaztek antolatutako ajoarriero lehiaketan 13 bikotek hartu zuten parte. Lehen saria Gaztinborda bikoteak lortu zuen, Xabier Legasa eta Beñat Maiak osatua, Bigarren saria Idoia Telletxea eta Paula Garciak eraman zuten (Bakailu Kuisine) eta hirugarrena Kordionistek, Mikel eta Aitziber Maia anai-arrebek. Epaimahaia Arantzako Aterpeko Joseba Zugarramurdik, Dantxarineko Landibar bentako Julen Zubietak Berako Zalaingo Iñaki Pikabeak eta Hondarribiko Ardorako Roberto Loiolak osatu zuten.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun