Gaur 30 urte inauguratu zuten Matxinbeltzenea Euskal Etxea Lesakan

1991ko azaroaren 24an, gaur hogeita hamar urte inauguratu zuen Bortzirietako Euskaltegiak (IKA) Matxinbeltzenea Euskal Etxea Lesakan. Garai hartako Ttipi-Ttapa aldizkariak jaso zuenez, jende eta pertsonalitate ugari bildu ziren inaugurazio ekitaldian. Bortzirietako alkate eta zinegotzi gehienekin batera, han zeuden Nafarroako Gobernuko Hizkuntza Politikarako Zuzendari Nagusia zen Jose Maria Rodriguez Otxoa, Estebe Petrizan zuzendari ohia, Juan Jose Ekisoain Hezkuntza Departamentuko zuzendaria, Mikel Petrirena EHNE Nafarroako lehendakaria eta kultura eta euskara munduko hainbat ordezkari.

Patxi Petrirena irakasleak aurkeztu zuen ekitaldia eta Manolo Arozenaren bertsoen ondotik, Bortzirietako Euskaltegiko arduraduna zen Mikel Legarrak «urte osoko lan nekagarriak fruituak eman dituela eta honek ilusio eta indar berriz aitzinera begiratzeko ematen duen indarra» azpimarratu zuen.

Bortzirietako Euskara Mankomunitateko lehendakaria zen Juan Miguel Almandoz Arantzako alkateak dirulaguntzen beharra azpimarratu zuen, «Bortzirietako Euskara Mankomunitateak ezin baitu berak nahi hainako laguntzarik eman». Lesakako abesbatzak ere kantatu zuen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun