Lesakako saihesbidea egiteko 500.000 euroko dirulaguntza hartuko du udalak Espainiar estatuko aurrekontu orokorretatik

Ttipi-Ttapa 2021ko aza. 23a, 08:00
Fabrikako errepidea (eskuinean) saihesbidea egiteko baliatzea aspaldiko asmoa da Lesakan.

Espainiar Estatuko Aurrekontuetarako Espainiako Gobernuaren eta EH Bilduren arteko negoziazioen ondotik, Lesakako Udalak 500.000 euro hartuko ditu NA-4000 errepidean Lesakako saihesbidearen proiektua idazteko.

Diru horri esker, herriko mugikortasuna eta garapena aldatuko dituen proiektu bat idatzi ahal izanen dela azpimarratu du Lesakako udalak, «dauden egiturazko arazoei aldagai eta konponbide berriak emanez». Zehazki, trafikoa erdigunetik ateratzeko proiektua dela ageri da aurrekontuetan.

«Poliki-poliki, zuek emandako konfidantzari esker aitzinera goaz, gure herriaren hobekuntzarako beharrezkoak diren pausuak emanez», dio Lesakako EH Bilduko udal taldeak.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun