Lesakako trial taldeko gaztetxoak bikain ibili dira Aretxabaletako proban

Xabier Valverde lesakarra garaile izan zen infantil mailan eta Oier Mitxelena beratarra laugarren elite mailan

Aretxabaletako Oztopo Trial klubak antolatutako proba egin zen igandean eta bertan emaitza ederrak lortu zituzten Lesakako Trial taldean ari diren gaztetxoek. Aipagarriena, Xabier Valverde lesakarrak infantil mailan lortu zuen lehen postua, podiumeko goitiko koskara igotzeko aukera eman ziona. Elite mailan, laugarren izan zen Oier Mitxelena beratarra.

Horietaz gain, hasiberrien mailan bosgarren izan zen Uxuri Portu lesakarra eta promesa mailan, zazpigarren Oihan Castro lesakarra eta hamargarren Julen Aierdi oiartzuarra. Infantil mailan, Goiuri Urrak ez zuen proba bukatzerik izan, min hartu baitzuen.

Lesakako Trial taldetik eskerrak eman nahi dizkiote Lesakako udalari, orain arte emandako erraztasunengatik.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun