Berako kirol instalazioak kudeatzeko enpresa publiko bat sortuko du Berako udalak

Ttipi-Ttapa 2021ko urr. 15a, 18:00

Urriaren 7an egindako udal plenoan Berako kirol instalazioak kudeatzeko %100eko kapital publikoa izanen duen merkataritza sozietate bat sortzea onartu zuen udalak aho batez. 

Irailaren 15ean egindako osoko bilkuran proiektua aztertzeko Azterketa Batzorde bat sortzea erabaki zuen udalak. Azterketa Batzordeak funtzionamenduaren alderdi jurudiko, tekniko eta ekonomiko-finantzioaren garapena jasotzen duen txostena egin zuen, eta egiaztatu zuen eraginkorragoa eta efizienteagoa dela kudeaketa kapital publikoko merkataritza sozietate baten bitartez egitea, udalak berak egitea baino.  Azterketa Batzordeak bere lana eginda, urriaren 7an, sozietatearen estatutuen proiektuaren zirriborroa aurkeztu zuten.

Orain, 30 egun naturaleko epea izanen du udalak memoria eta estatutuen proiektua jendaurrean jartzeko, eta epe horretan aurkezten ahalko dira alegazioak eta oharrak ere.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun