Irakurketa taldea sortu nahi dute Arantzan

Ttipi-Ttapa 2021ko ira. 21a, 15:00

Joan den astean zabaldu zuten Arantzako liburutegia eta geroztik astean bi aldiz irekitzen dute, astelehen eta asteazkenetan. Horrez gain, herritar talde batek irakurketa taldea sortu nahi du liburutegian eta irailaren 30ean eginen dute lehenbiziko hitzordua.

Arantzako liburutegia astelehenetan eta asteazkenetan irekitzen dute, 16:30etik 18:00etara, eta Arantzako Udalak jakinarazi duenez, lanak egiteko mahaian gehienez sei lagun egoten ahalko dira eta sofan lau. Neurriak jarraituz, eskuak desinfektatzea eta musukoa paratzea beharrezkoa izanen da. Hori horrela, «liburutegiaz gozatzeko» deia egin du.

Horrekin batera, herritar talde batek irakurketa taldea sortu nahi du liburutegian. Euren asmoa liburu bat aukeratu eta taldekideek liburu bera leitzea da, ondotik hilabetean behin elkartu eta horri buruz solastatzeko. Oraingoz, hilabeteko azken ortzegunetan, 18:00etan bilduz hasi nahi dute eta irailaren 30ean eginen dute lehenbiziko hitzordua, 18:00etan liburutegian.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun