Osiña eta Larreta karriken arteko bidegurutzetik Azkilarrea eta Aientsa auzoetara doan auzo-bideari eta medikuaren kontsultategitik Azkilarreara doan bideari eraginen die ordenantza honek. Salbuespen kasuak kenduta, bi eremu horietan ezin izanen da ibilgailu-motordunekin pasatu.
Pasatzeko baldintzak
Ibilgailu motordunak pasatzen ahalko dira baldin eta ibilgailuan doan lagunetako batek baldintza hauetakoren bat betetzen badu:
- Arantzan erroldatua egotea.
- Ohiko bizilekua Arantza izatea.
- Azkilarrea edo Aientsa auzoetako landetxeren batean ostatu hartua izatea.
- Azkilarrea edo Aientsa auzoetan lurrak edo ondasunak izatea.
- 6 urtetik beherakoa izatea.
- 70 urte baino gehiago izatea.
- % 33tik goitiko desgaitasuna egiaztatua izatea.
- Gainerako arrazoi justifikatuak, hala nola, lan edo osasun arrazoiak.
Beraz, ez da ibilgailu motordunak pasatzea baimenduko, bidarietako batek ez badu betetzen baldintza horietako bat guttienez. Larritasunaren arabera, araua hautsiz gero, 50 eta 300 euro arteko isuna paratuko dute. Dena den, 15 egun pasatu aitzinetik arau-hausleak isuna ordaintzen badu, erdira murriztuko dute isuna.
Arantzako Udalak joan den ekainaren 22an egindako osoko bilkuran onetsi zuen hasiera batez ordenantza. Gero jende aitzinean egon zen 30 egunez, eta epe horretan inor ez zuenez alegaziorik aurkeztu, behin betiko onartua gelditu da.