Irailaren 15ean egin zen Berako udal batzarrak zenbait aldaketa ekarri zituen EH Bilduko udal taldean. Alde batetik, Arantxa Zubieta Otxotekok zinegotzi kargua utzi egin du. Horrelako kasuetan, hautagai-zerrendan ondotik dagoenak hartzen du hutsik gelditu den kargua baina, kasu honetan, ondotik zerrendan zeuden lauek ere kargu-hartzeari uko eginez idazkia aurkeztu dute Berako Udalean. Gauzak horrela, ordezko gehiagorik ez dagoenez, sortu den egoeraren berri eman dio Udalak Hauteskunde Batzorde Zentralari.
Bertze aldetik, bi agintalditan alkate izan zen Josu Iratzoki Agirrek EH Bilduko udal taldea utzi du, baina zinegotzi karguarekin segituko du. Hemendik aitzinera «adskripziorik gabeko» zinegotzia izanen da, hau da, ez da Berako Udalean dauden bi taldeetatik bakar batean ere partaide izango.