Nafarroako I. Open Disc Golf Txapelketa jokatuko da irailaren 11n eta 12an, duela bi urte inauguratu zen Igantziko IrriSarri Land-eko Disc Golf zelaian, Baxi Basajaun elkarteak antolatua. Txapelketan espainiar estatuko jokalari onenak izanen dira eta hainbat kategoritan jokatuko da. Galizia, Madril, Euskal Herria, Katalunia, Kadiz eta Asturiasko klubetako jokalariek izena emana dute dagoeneko.
Txapelketa honako kategoriatan lehiatuko da: Open (MPO), Emakumezkoak (FA1), Amateurrak (MA1), Master (MA40) eta Jubenilak (MJ18) dira. Kategoria guztiak hemezortzi saskiko hiru kanporaketetan jokatuko dituzte, horrela Espainiako Disc Golf Elkarteak eskatutako gutxieneko baldintzak betez.
Izen-ematea
Izen ematea oraindik zabalik dago, gehienez 72 jokalarik hartuko dute parte, inskripzioa Disc Golf Metrix webgunetik egin daiteke.
Disc Golfa, denontzat egokia
IrriSarri Landeko zelaia izan zen Nafarroan egin zen lehen Disc Golf zelaia eta abentura parkean egin daitekeen jardueretako bat da. Donezteben ere, hiru saskiko zelai publikoa inauguratu dute aurten Intzakardi parkean. Gazteak eta helduak erakartzen ditu eta elbarrien artean ere praktikatzen da. Munduko 20 herrialdetan daude Disc Golf zelaiak, 1.300 zelai baino gehiago daude AEBetan eta Kanadan zehar, Europan berriz iparraldeko herrialdeetan aintzindariak izan dira.