Ignacio Larraren ‘Nire gurasoei omenaldia’ erakusketa ikusgai paratuko dute Beran

Ignacio Larramendiren margolanak larunbatetik aitzinera ikusgai izanen dira Berako kultur etxean.

Larunbatean 19:00etan eginen dute inaugurazioa eta abuztuaren 29ra arte egonen da Kultur Etxean

Ignacio Larraren ‘Nire gurasoei omenaldia’ margo erakusketa ikusgai izanen da Berako kultur etxeko erakusgelan uztailaren 31tik abuztuaren 29ra, Berako Kultur Batzordeak eta Berako udalak antolatua. Inaugurazio ekitaldia larunbatean 19:00etan eginen da eta asteartetik igandera irekia egonen da (astelehenetan itxia), 10:00etatik 13:00etara eta 17:00etatik 19:00etara. Igandetan eta besta egunetan arratsaldez itxiak egonen dira kultur etxeko ateak.

1954ko irailaren 21ean jaio zen Caracasen (Venezuela). Gumersinda Díez eta Juan Larramendiren semea da. Bere aita margolari ospetsua izan zen eta bere gidari artistikoa ere bai.

Denbora batez Amsterdamen bizi izan zen bere emaztearekin eta bertan Holandako artea eta bere pintura lerroa ezagutuko zituen.

1983an, Berako Herriko etxearen birmoldaketan, pintura zaharrak agertu ziren fatxadan. Julio Caro Barojak ikusi eta aztertu zituen eta berreskuratzea erabaki zen. Car Barojak zirriborro batzuk egin zituen eta Ignacio Larramendiri eman zitzaion obra zuzendaritza.

23 urtez Donostiako Echeverría galeriarentzat eta Madrilgo Castelló 120 galeriarentzat bakarrik lan egin zuen. 2012ko ekainaren 1ean, Madrilen, Ricardo Sanz margolariaren eskutik, Cultura viva Arte Ederren XXI. Sari Nazionala jaso zuen, estatuko elkarte pribatu garrantzitsuenetariko batena. Bere obraren zati handi bat bilduma pribatuek osatzen dute. Julio Caro Barojaren jaiotzaren mendeurreneko erakusketa-omenaldia sortu zuen 2014an.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun