Hiru Erregeen Mahaira ateraldia antolatu dute Agerra Mendi Taldeak eta Manttalek

Ttipi-Ttapa 2021ko uzt. 9a, 15:00
Agerrako eta Manttaleko kideak duela bi urte Taillonera egindako ateraldian. Aurten Hiru Erregeen Mahaira joatea erabaki dute.

Bi urtetik Taillonera egiten duten ateraldiaren ordez eginen dute aurten uztailaren 17an

Bi urtero, Agerra mendi taldeak eta Manttalek mendi ateraldia antolatzen dute Taillonera, Loro Pikabea, Xabier Zubieta eta Xabier Saralegi gogoratzeko. Aurten, Covid-aren eragindako osasun krisialdia dela eta Frantziara bidaiatzeko dauden arazoak ikusita, Taillonera joan ordez, Hiru Erregeen Mahaira ateraldia antolatu dute, Linzako aterpetik abiatuta. Uztailaren 17an, larunbatarekin, izanen da ateraldia eta nahi duen guziak parte har dezake.

Txangoa larunbatean 05:30ean abiatuko da Iamoteneko aparkalekutik. Izen-ematea Agerrako Pikabea harategian egin behar da eta pertsona bakoitzeko 20 euro ordaindu beharko da (autobusa eta bazkaria barne). Bortz ordu inguruko mendi txangoa da, 17 kilometro luze (joan-etorria) eta 1.270ko desnibela duena.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun