Eguraldi onak eta Covid-19ak eragindako pandemiari aurre egiteko neurrien erlaxazioak sozializatzeko eta ostalaritza establezimenduetako terrazez gozatzeko aukera ematen dute. Hala ere, gozamen hori bizilagunen atsedenerako eskubidearekin bateragarri egin behar da, musikak edo zaratak eragindako eragozpenak saihestuz. Hala eskatu du Berako udalak, bando baten bidez.
Ildo horretatik, ostalaritza establezimenduei ohartarazpena egin die Berako Udalak, Aitor Elexpuru alkateak sinatutako bando baten bidez. Honela, «irekitzeko eta ixteko ordutegiak Nafarroako Gobernuak pandemiaren bilakaeraren arabera unean-unean ezartzen dituenak» izanen direla ohartarazi du udalak, baita Jarduera Sailkatuen Ordenantzaren arabera, kanpoko soinu-mailak ezin duela 55 dBA gainditu eguneko ordutegian (22:00 arte) eta 45 dBA gauekoan.
Berako udal bandoak dioenez, «establezimenduaren titularra arduratuko da ordutegiak soinu-mailak eta gainerako neurriak kontrolatzeaz» eta udalak Foru Poliziari jakinaraziko dio ezagutzen duen edozein ez-betetze.
Bide batez, ostalaritza establezimenduei laguntza eskatu nahi die Berako udalak, «beraien jarduera garatzeko duten eskubidea bateratzeko bizilagunek beraien etxeetan bakea eta atsedena izateko –behar ez bezalako zaratak eta eragozpenak jasan behar izan gabe– duten eskubide legitimoarekin».