GUTUNA: V. Ibardingo Igoera

Ttipi-Ttapa 2021ko eka. 13a, 10:00

Ekainaren 5ean egin zen V. Ibardingo Igoera hizpide izan du Jaione Iraola Rozasek. Errepide bazterrean du etxea eta lasterketaren egunean ibilgailu batek etxeko barandaren kontra jo zuela kontatu du. Lehenbiziko aldia ez dela ikusita, galdera hauek bota ditu: «Ezbeharren bat gertatu behar ote da pertsonen segurtasunak lehentasuna izan dezan? Halakorik behar ote dute antolatzaileek edota froga baimentzen dutenek?».

Duela gutxi, ekainaren 5ean, V. Ibardingo Igoera ospatu zen Beran. Ohikoa bihurtu da auto-lasterketa ospatu aurretik, aste batzuk lehenagotik, kotxeak ziztu bizian ibiltzea errepide horretatik. Horrek arrisku larria dakar gainontzeko gidarientzat (gehienak Ibardingo langileak), txirrindularientzat eta inguruko bizilagunontzat. Egoera okerrera doa rallyaren bezperan, ilunabarretik gaueko ordu txikietaraino abiadura izugarrian pasatzen diren kotxe kopurua haunditzen baita.

Gure etxea errepide bazterrean dago. II. Ibardingo Igoeraren bezperan, kotxe batek talka egin zuen etxearen kontra. Aurten, berriro. Ibilgailu batek gure etxeko barandaren kontra jo zuen lasterketaren egunean. Hau ez da kasualitatea, lasterketaren inguruan sortzen den giroaren ondorioa baizik. Giro horrek herritarron segurtasuna arriskupean jartzen du.

Oraingoz, etxearen kontra jo dute, lautik bitan. Zer izanen da hurrengoa? Argi dago arriskua hor dagoela, eta hor jarraituko duela lasterketa mantentzen den bitartean. Probabilitate kontua da. Hala behar luke?

Ezbeharren bat gertatu behar ote da pertsonen segurtasunak lehentasuna izan dezan? Halakorik behar ote dute antolatzaileek edota froga baimentzen dutenek? Galdera horiek egiten dizkiot neure buruari eta hortxe uzten ditut hausnarketarako.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun