Udaberriko Besten bigarren asteburua izanen dute Igantzin

Pauline eta Juliette musikariek kontzertu ederra eman zuten joan den igandean Baratzondon.

Joan den igandeko Pauline eta Julietteren emanaldiaren ondotik, Amets Arzallusen Miñan liburua aurkeztuko eta Irungo Harrera Sarea ezagutuko dute ekainaren 11n

Udaberriko Besten egitaraua hasteko Pauline eta Juliette musikarien emanaldia izan zuten igandean Igantzin. Baratzondon elkartutakoek gozatu ederra hartu zuten emandako saioarekin. Ederki hasi ziren kultur egun hauek eta asteburu honetan izanen dute segida. Ekainaren 11n, ortziralean, 18:30ean Baratzondoan Amets Arzallusen eta Ibrahima Balderen Miñan liburuaren aurkezpena eginen dute, Irungo Harrera Sarean lanean ari den Joxean Ortegaren solasaldiarekin batera.

Aitzinera begira ere, bada oraindik zer egin, zer aditu eta zer ikusi… Ekainaren 20an, igandean, merkatu ttikia eginen dute (puskak eman nahi izanez gero, oraindik badago aukera), eta egun hori osatzeko herriko dantzariek emanaldia eskainiko dute eguerdian eta musika eta dantza herrikoiak arratsaldean.

Euskara batzordeak antolatutako Udaberriko Bestak bukatzeko, ekainaren 27an, igandearekin, Bideak dokumentala ikusgai izanen da 18:30ean Baratzondon. Aritz Ganboa, Arruazuko artzain ezaguna eta Xabier Unanue zuzendaria bertan izanen dira.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun